Azken bi urteotan eginiko lanak bildu ditu Iñaki Arrillaga oriotarrak Zergatik hamalau erakusketan. Oteiza nondik nora ibili den ikusiaz eta hark eginikoa erreferentzi gisa hartuta, bere interpretazio propioa eman die Arrillagak. Bilduma jendaurrean erakusten duen lehenbiziko aldia du, eta eskultura eta akrilikoz margotutako collage-a erabili ditu artistak bilduma osatzeko.
Oteizak Arantzazuko apostoluak amaitu zituenetik 50 urte igaro dira. Sorkuntza hori abiapuntu hartuta hasi zen ikertzen Arrillaga Oteizaren lanak. Hamalau egin zitula zioen Oteizak, Orioko arraunlariak zirelako. “Oteizak bere leihotik Orioko arraunlariak errioan ikusiko zituela pentsatu nuen, eta apostolu horiek arraunlarien bihotz zatitxo bat ere edukiko dutela uste dut”. Hari horri tiraka sortu zituen bere diseinuak Arrillagak, eta erakusketa honetan bildu ditu horietako batzuk.
Irailaren 1era bitartean zabalik izango da bilduma Zumaiako Alondegiko Oxford aretoan, egunero, 18:30etik 20:30era.