1998. urtean sortu zuten Txurrumuski aisialdi elkartea Orion. "Hasiera horretan begirale eta boluntario gisa jardun zirenen ilusioa eta gogoa" ondorengo belaunaldiek jaso eta pasatu dutela adierazi dute taldeko kideek, "urtez urte". "Herritar asko igaro gara taldetik", gehitu dute.
Txurrumuskik 20 urte beteko ditu aurten, eta larunbatean, maiatzak 4, ospatuko dute. 11:30ean emango diete hasiera ospakizun jarduerei; haur eta gazteentzako txokoak eta jolasak izango dira Orioko plazan, 13:00ak arte. Jarraian, taldearen parte izan diren begirale guztiak elkartu eta Errota gaztetxean bazkalduko dute. Bazkalostean, aldiz, poteoa egingo dute Orioko kaleetan barrena, trikitilariekin.