Xabier Lizaso piano-jotzaile oriotarrak martxan jarritako Do Re Ni proiektuari buruz mintzatu ziren atzo, asteartea, EITBko Ur handitan saioan. Musikaren bidez, pertsonen "era guztietako gaitasunak" lantzen eta hobetzen saiatzea da egitasmoaren helburua, "ez soilik musikalak". Lizasok Donostian zein atzerrian gauzatu ditu bere ikasketak, hain zuzen, Ingalaterran eta Polonian. Euskal Herrira itzuli zenean, "musika helburu izatetik, pertsona helburu izatera" pasatu zen, eta modu horretan azaldu du proiektuaren sorrera. Hala, azken urteetan eskoletan "musikaren bidez haur eta gazteen bizitzan eragiten" ahalegingu da oriotarra.
Do Re Ni izan dute ardatz Ur handitanen, eta Lizaso ageri da proiektuaren sorkuntza prozesua eta nondik norakoak azaltzen. Abiapuntu horri helduta, orokorrean "musikak gizakien bizitza hobetzeko duen ahalmena" aztertu dute saioan.