Ertzaintzak 37 urteko gizon bat atxilotu zuen atzo goizaldean Orion, Usurbilgo gasolindegi batetik ordaindu gabe alde egiteagatik. Izan ere, Aritzeta zerbitzuguneko gasolindegi batean 44 euro erregaia hartu zuen gizonak eta ordaindu gabe alde egin zuen. Gasolindegiko arduradunek Trafikoko Unitateko patruila bati eman zioten gertatutakoaren berri, eta agenteek atzetik jarraitu zioten, Orioko ordainlekuan, autobidetik irtetera zihoanean, geldiarazi zuten arte.
Ertzaintzatik jakinarazi dute, atxilotuak jarrera oldarkorra izan zuela agenteekin identifikatzerakoan, eta menderatu egin behar izan zutela. Horregatik, iruzur delitua eta agintaritzaren agenteen aurkako atentatua eta desobedientzia larria leporatu dizkiote.