Ez Itxi Begiak elkarteko kide Joanito Orella oriotarra buru-belarri lanean aritu da azken egunetan, gaur goizean furgoneta beteta Atenas aldera abiatzeko. Izan ere, Donostiako mediku batek urtebeteko eszedentzia eskatu du Atenasen errefuxiatuei zuzendutako erietxe txiki bat irekitzeko, eta proiektu solidarioari laguntzeko materiala bildu du Orellak Orion. Janaria, osasun-materiala, haurtxoentzat janaria eta esne berezia edota gurpildun aulki bat darama furgonetan, besteak beste.
Gaur iluntzean Italiako Pisa hirira iritsiko da taldea eta bertan igaroko dute gaua. Pisatik Barira bidaia egingo dute, eta han itsasontzia hartuko dute Greziako Patras hirira iristeko. Patrasetik Atenasera joango dira zuzenean.