Gai guztiak aho batez onartu ziren

Industria eta erabilpen tertziarioena ere orain arteko kopuruetan mantenduko litzateke. 49.581,93 euro bilduko lirateke honela.

Zarata mapa behin betikoz onartu da

Orioko Udalak herriko zarata-mapa egin du 2015. urtearen bukaeran, eta udalbatzarrak 2016ko apirilaren 5ean eman dio lehen onarpena. Asteleheneko udalbatzarrean behin betikoz onartu zen. 

Zarata-mailari dagokionez herriko egoera zein den azaltzen du zarata-mapak, legeak markatzen dituen parametroetan. Europako araudiak zehazten du nola neurtu behar den kutsadura akustikoa eta zein neurri zuzentzaile aplikatu behar diren kutsadura horri aurre egiteko.

Berez, 10.000 biztanletik gorako herriak daude legez behartuta zarata-mapa egitera; baina Orioko Udalak egin egin du, Eusko Jaurlaritzak emandako diru-laguntza bat baliatuta.

Zaraguetari urtean 45.000 euro emango dizkio Udalak

Orioko Udalaren eta Zaragueta Herri Eskolako guraso batzordearen arteko lankidetza-hitzarmena onartu zen ondoren eta alkateari hitzarmena sinatzeko ahalmena eman zitzaion. Hitzarmenak dioenez, laburbilduta, Zaragueta Herri Eskolako guraso batzordearen jarduera eta proiektuak Udalak diru laguntza bidez finantzatzeko baldintzak zehaztuko dituzte. 

Ohiko hezkuntza jarduerak eta arautu gabeko jarduerak dira Udalak finantzatuko dituenak. Diru laguntza jasoko dituzten jarduerak ere zehatz meatz zerrendatuta daude hitzarmenean: guraso batzordeak egindako hezkuntza jarduera, batzordeak Orioko herrian egindako hezkuntza, kultura, ingurmen, kirol eta gizarte alorreko jarduerak; hezkuntza zabaltzeko jarduerak, euskararen erabilera sustatzeko jarduera edo programak; hezkuntza garapen komunitarioko programak eta aisialdirako hezkuntza programak; garapen iraunkorrarekin lotutako Zaraguetak egindako eskola programak; balioa, heziketa eta errespetua sustatzeko jarduera edo programak; ohitura osasungarriak sustatzeko ekimenak; diru laguntza jaso dezaketen kirol jarduerak, jarduera horiek foru aldundiak ezarritako irizpideak bete beharko dituzte; herriko eskola komunitatearen bizikidetzan hobekuntzak ekar dezaketen jarduerak; herriko beste eragileek ikastetxean egindako jarduerak, horiek ikastetxeari gastua suposatzen badie eta gastu horietarako ez badago aurreikusita beste erakunderen baten laguntza; irakaskuntzaren kalitatea sustatu eta eskola kudeaketa hobetzeko proiektuak; irakaskuntzarako jarduera eta proiektu berritzaileak; udalerrian euskararen erabilera sustatzeko jarduerak; udalarekin elkarlanean antolatutako hainbat programa.

Udalak ez dio Zaragueta Herri Eskolako guraso batzordea hitzarmen honetan adostuta ez dagoen laguntza ekonomikorik emango. Arau orokor horrek bi salbuespen izango ditu: herriko festetan batzordeak antolatutako jarduerak edo udalak berak proposatutako jarduerak, batzordean hala adostu bada.

Hitzarmenetik kanpo gelditzen dira jarduera normalak gauzatzeko behar diren inbertsioak. Inbertsioak ez-ohikoak diren ala ez adostea jarraipen batzordearen zeregina izango da. Jarraipen batzordea alderdi bakoitzeko hezkuntza batzordeko kideak eta guraso batzordeko beste horrenbeste lagunek osatuko dute.

Eta, hori guztia, urteko 45.000 eurorekin egingo da. Diru kopuru hori EAEko aurreko urteko IKParen arabera berrituko da. Irailaren 1ean jarriko da martxan hitzarmena eta indarrean egongo da 2020 abuztuaren 31ra arte.