Euskotren Liga amaitu da, baina arraun asko dago oraindik. Arraunlariek eta arraunzaleek burutik kendu ezin dute Kontxako estropada batetik, baina baita ordura arteko estropada guztiak ere. Tartean, asteburu honetakoa, Colindreseko bandera.
Erlojupeko estropada izan zen, ziaboga bakarrekoa. Oriotarrek ziabogan kale egin zuten, istriborretik hartu baitzuten. Hortaz, zuzendu eta ababorretik sartu behar izan zuten. Lan horiek egiten denbora dezente galdu zuten eta azkenak izan ziren ziabogatik ateratzen. 5:42 behar izan zituen azkarrenak, San Juanek; Oriok 6:27ko denbora markatu zuen ziabogan.
Bigarren luzean, ordea, bi traineruri aurrea hartu zien: Oiartzungo itsaslapurrei eta Colindresi. Zazpigarren postuan amaitu zuten neskek 11:37:06 denboran geldituta kronometroa. Irabazlea San Juan izan zen, 10:41:67 denborarekin. Bi segundora Zumaia sailkatu zen eta Hibaika hirugarren. Aurtengo denboraldian, orain arte, Orioren atzetik gelditu diren Zarautz, Donostiarra eta Hernani izan ziren ondorengo sailkatuak.
Gipuzkoako Ligako irabazlea ere izendatu zen larunbatean, eta Zumaiak eraman zuen liga horretako bandera. Oriotarrak laugarren gelditu ziren ligako sailkapen orokorrean 62 punturekin, Hibaikarengandik sei puntura.