Pasa den asteburuan, maiatzaren 11n, arratsaldez, Anoetako pistan izan ziren Orioko Atletismo Taldeko hainbat kide parte hartze libreko probetan. Martin Iriondok Espainiako Atletismo Txapelketan 1.500 metroko lasterketan parte hartzeko txartela eskuratu zuen, 3:59 denbora markatuta, eta Xabat Elortzak, berriz, 9:34 denborarekin, 3.000 metroko oztopo proban parte hartuko du.
Bestalde, Jokin Bellidok, Aitor Iturraldek eta Sunhai Huegunek ere parte hartu zuten 1.500 metroko lasterketan, Martin Iriondorekin batera, eta marka ezin hobeak egin zituzten: Jokin Bellidok 4:01, Aitor Iturraldek 4:08 eta Sunhai Huegunek 4:12, besteak beste.
Eta, amaitzeko, 16 urtez azpiko mailan, Gipuzkoako Atletismo Txapelketan, 1.500 oztopo proban aritu zen Xare Elortza, 6:23 denbora lortuz.