Eusko Label ligaren historian soilik hiru gizonek irabazi dituzte 100 bandera edo gehiago, eta hirurak dira Orio Arraunketa Elkartean ibiliak: Gorka Aranberri, Xabier Etxebeste eta Andres Medina. Aurreneko biak ondoko herrikoak dira, gainera; zarauztarrak.
Hiruretan Medinak du bandera gehien: 109 (momentuz). Xabier Etxebestek 101 ditu, eta gaur egun ez dabil arraunean. Aranberrik igandean irabazi zuen ehungarrena, eta berak eta Medinak kopurua handitzen jarraitzeko aukera dute, Orioko taldean baitabiltza biak elkarrekin, Medina arraunlari, eta Aranberri patroi.
Azken horrek banderen ia erdiak Orion lortuak ditu, 46 oraingoz. 2017. urtean lau bandera, 2018an hiru, 2019an zazpi, 2020an bi, iaz hamasei, eta aurten hamalau bai dagoeneko.
Etxebestek lau urte egin zituen Orio AEn, 2004tik 2007ra, eta Kontxa Bandera ere irabazi zuen Oriorekin.
Medina, azkenik, iaz iritsi zen Oriora, Iker Zabala entrenatzailearen eskutik.