Arratsaldeko sei eta erdietan zen hitzordua eta bertsolariak iristerako instrumentuak afinaturik zeuzkaten herriko txarangako kideek. Azken orduko Jone Uriaren baja Andoni Egañak bete zuen eta Jon Maiarekin batera oso saio polita osatu zuten herriko kaleetan zehar.
Jende mordoxka bildu zen ekitaldiaren inguruan eta euriak ez zuen eragotzi han bildutako jendearen bertso-gosea. Bi bertsolariek egin zuten lanarekin izugarri gozatu zuten afalordurarte iraun zuen saioan.
Hemen doakizue Andoni Egañak atzo bertan botatako bertso bat:
Nobedadea ez zen gu biok
bertso batzuk kantatzea,
nobedade gaur txaranga gendun
hori da hori jotzea!
nire ustetan kultura zer den
komeni zait azaltzea:
izan liteke talde top-en bat
areto baten sartzea,
ta izan liteke herria bera
mugimenduan jartzea.