Urtea kirola eginez amaitzeko, San Silbestre lasterketak egingo da aurten ere Orion eta Aian. Oriotarrak goiz-eguerdi partean aterako dira lasterka, eta arratsaldean, berriz, aiarrak.
Oraindik ere eman daiteke izena Orioko lasterketan, gaur 22:00ak bitarte, kronoak.com atarira jota. Ohi bezala, haurrek taldeka egingo dute korrika. Aurrena, HH 5. mailatik beherakoen txanda izango da, 11:00etan. Kutxa paretik helmugara arteko bidea egingo dute, 150 metro guztira. LH 1 eta LH 2 mailetakoek handik hamar minutura egingo dute lasterka, 11:10ean, Sarasua paretik helmugara (300 metro) eta ondoren, 11:20ean, LH 3 eta LH 4 mailetakoek (600 metro). LH 5, LH 6, DBH 1 eta DBH 2 mailetakoek, berriz, 11:30ean egingo dute korrika. San Silbestreko buelta txikia egingo dute horiek (1.700 metro).
Azkenik, helduen proba 12:00etan hasiko da. Horiek aurrena buelta txikia egingo dute, eta ondoren, buelta handia (1.700 metro + 3.300 metro).
Aian, berriz, arratsaldean aterako dira herritarrak korrika plazatik, 17:00etan. Izena probaren aurretik eman beharko da plazan bertan, 16:30ean.