Eskualdeko udalek eta ikastetxeek osatzen duten Hezkidetza Foroaren proposamenez banatzen ari dira banderolak, eta aurten banaketa egiten den bigarren aldia da. Orioko Udala eta Ahalduntze Eskola elkarlanean ari dira zeregin horretan.
Gaur, asteartearekin, Udalak mezua eman du argitara, herritarrak banderolak balkoian jartzera animatzeko helburuarekin. Ekimenaren bidez, gogora ekarri nahi dute "berdintasuna lortzeko geratzen zaigun bidea". Euro bateko prezio sinbolikoa dute oihal moreek, eta Ahalduntze Eskolan eskuratu daitezke ostiral arratsaldeetan. Bestela, kultur etxean bertan edo gizarte zerbitzuen bulegoan ere bai, haien ordutegiaren barruan. Biltzen den dirua Ahalduntze Eskolarentzat izango da.