Pandemiaren bigarren olatua ari da pixkanaka indarra galtzen. Positibo kopurua beherantz ez badoa ere, egonkortuta dagoela esan daiteke. Eusko Jaurlaritzako Osasun Sailak emandako datuen arabera, ez zen positiborik atzeman atzo ez Aian eta ez Zarautzen. Aste honetan, hain zuzen ere, lau izan dira kasuak: bi astelehenean, eta bana astearte eta asteazkenean. Azken datuekin, beraz, intzidentzia tasa 395,97koa da.
Urola Kostako gainontzeko herrietan hamasei kasu izan ziren atzo, bezperan izandako kopuru berea. Bitxikeria moduan, aipatu pandemia hasi zenetik lehen kasua detektatu dutela Beizaman.
Sei positiborekin Azpeitia da kasu gehien izan duen herria eskualdean. Datu hauen ondoren, 100.000 biztanleko azken hamalau egunetako kasu positiboen tasa 431,75ean dago, eta laranja kolorearekin jarraitzen du semaforo bitxi honetan. Kilometro gutxira, Azkoitian, bi kasu zenbatu dituzte, eta gorriz margotuta jarraitzen badu ere, intzidentzia tasa 500etik jaistetik hurbil dago: 508,8ko tasa da atzoko datuen ondoren.
Zarautzen lau kasu baieztatu zituzten atzo –360,5eko kasu metatuen tasa du–, bi Getarian, eta pandemia hasi zenetik lehendabizikoz kasu bat izan dute Beizaman. Eskualdeko beste sei herrietan ez dute positiborik izan.
Hego Euskal Herrian dezente jaitsi da positibo kopurua: bezperan izandako 743tik 602ra jaitsi da positibo eman duten pertsonen kopurua.
Ospitaleratutakoi dagokionez, beti ere Osakidetzako datuen arabera, beste 40 lagun ospitaleratu zituzten atzo, eta 335 lagun zeuden osasun zerbitzu honen erietxeetan, plantan; ZIUn, aldiz, 129 ziren ingresatuta zeuden lagunak.