Gaur hasi da Euskaraldia, euskaldunen hizkuntza ohiturak eraldatzea helburu duen egitasmoa. Gaurtik abenduaren 4ra bitartean egingo da ariketa soziala, eta egun horietan zehar, egitasmoarekin bat egiten dutenak euskararen alde apustu egiten saiatuko dira. Hau da, euskara ulertzen duten guztiak beren egunerokoan euskarari leku gehiago egiten eta horretaz kontzientzia hartzen ahaleginduko dira. Helburua bat eta bakarra da: euskararen erabilera handitzea.
Euskara ulertzen duten guztiak daude deituta Euskaraldian parte hartzera, eta horiek hilaren 24ra bitartean eman dezakete izena. Sarean, euskaraldia.eus webgunean eman daiteke izena, eta telefono mugikorretarako (Android zein IOS sistemadun gailuetarako) sortu den aplikazio berriaren bidez ere bai. Gainera, tokian tokian ere jarriko dituzte Euskaraldian izena emateko edota txapak jasotzeko postuak egunotan.
Aurten, bi aukera daude parte hartzeko. Batetik, norbanako bezala eman daiteke izena, ahobizi edo belarriprest rola aukeratuta. Ahobiziek euskaraz ulertzen duten guztiekin euskaraz egingo dute, eta ondokoak euskaraz ulertzen ote duten ez dakienean lehen hitza, beti, euskaraz egingo dute. Belarriprestek, berriz, nahi eta ahal beste egin dezakete euskaraz, eta besteek euskaraz egin diezaioten eskatuko dute.
Bestetik, taldean parte hartzeko aukera ere izango da aurten, ariguneen bidez. Euskaraz lasai aritzeko guneak dira ariguneak, eta entitate barruan (barne ariguneak) edo entitateak herritarrekin duen harremanean (kanpo ariguneak) sor daitezke.
Urola Kosta inguru euskalduna izanagatik, eskualdean ere badago zer hobetua, eta, beraz, antolatzaileek herritarrak animatu dituzte Euskaldian izena ematera eta hizkuntza ohituretan aldaketak egitera.
Azken Euskaraldia
Duela bi urte egin zuten Euskaraldiaren lehen ekinaldia, eta sustatzaileen arabera, handiak izan ziren edizio hartako lorpenak: 225.154 lagunek eman zuten izena, Euskal Herriko erakunde nagusien babesa izan zuen egitasmoak, eta, esperientzia amaitu ostean, euskararen erabilera 5,6 puntu handiagoa izan zen parte hartzaileen artean. Antolatzaileek ontzat jo zuten ariketa soziala amaieran, eta hizkuntzaren normalizazioan «bide erakusle izan zitekeela» zehaztu zuten.
Aurtengo Euskaraldia berezia izango da, nolanahi ere. Osasun larrialdiak eraginda, herritar guztiek mugatuta dute mugikortasuna, eta horietako asko lehen baino gutxiago ateratzen dira etxetik. Beraz, duela bi urteko edizioan baino jende gutxiagorekin egingo dute hizketan herritarrek, eta horrek eragin zuzena izango du ariketa sozialean. Dena dela, jende gehiagorekin edo gutxiagorekin egon, elkarrizketa guztietan euskara txertatzeko ahalegina eginez gero, ziur lorpenak handiak izango direla, duela bi urte bezalaxe.