'Cholitas' filma emango dute gaur arratsaldean Etxeluze gaztetxean. Dokumentalak Boliviako bost emakume indigenen balentria du ardatz: Aconcagua mendiaren gailurra zapaltzea lortu zuten arropa tradizionalak jantzita. Lorpena ahalduntzearen eta askatasunaren aldeko aldarria zabaltzeko baliatu zuten.
Azaroaren 25a, Emakumeen Kontrako Indarkeriaren Aurkako Nazioarteko eguna izango da, eta horren bueltan egitarau bateratua antolatu dute Orioko hainbat eragilek elkarlanean: Xaltxerak talde feministak, Etxeluze gaztetxeak, Ahalduntze Eskolak eta udalak. Gaurko proiekzioak emango dio hasiera programari.