Urolako Komunikazio Taldeak, eta tartean KARKARAk, udako argazki lehiaketa antolatu du aurten lehen aldiz. Lehiaketan parte hartzen duten herritarrek sari bikainak lortu ahal izango dituzte; izan ere, epaimahaiaren saria, ikusleen saria eta bozketan parte hartzen duten herritarren artean zozkatuko den saria izango dira eskuragarri.
KARKARAk izendatutako epaimahaiak irailaren 15aren ostean hartuko du erabakia; hau da, epaimahai horrek erabakiko du zein den aurtengo lehiaketako argazkirik onena. Ondoren zabalduko da herritarrek argazki onenaren aldeko boza emateko epea, webgune honetan garatuta dagoen lehiaketa sistemaren bidez.
Sari bikainak eskuratu ahal izango dira aurtengoan. Epaimahaiaren saria jasotzen duen argazkiaren egileak, esaterako, Zudugarai txakolin boteila kaxa eskuratuko du. Karkara.eus-eko erabiltzaileen boto gehien jasotzen dituen irudiaren egileak, berriz, Egiguren Argazki Estudioaren eskutik 50x70cmko argazki anpliazio bat irabaziko du. Eta botoa ematen duten herritar guztien artean zozkatuko da bi lagunentzako zaldi ibilaldia, Usurbilgo Lar Zaldiak Hipika Klubaren eskutik.
Ezaugarriak
Uda sasoian ateratako argazkiak bilduko ditu KARKARAk webgune honetan, eta lehiaketaren fasea irailaren erditik aurrera jarriko du martxan. Horrenbestez, herritarrek irailaren 15era arte aurkeztu ahal izango dituzte irudiak, karkara@karkara.eus helbidera e-posta mezua bidalita edo Whatsapp bidez 688 88 94 29 telefono zenbakira idatzita. Parte-hartzaile bakoitzak, gehienez, hiru argazki aurkeztu ahal izango ditu lehiaketara.
Irudiak Whatsappez bidaltzen dituztenek 'KAR' eta argazkiaren izenburua zehaztu beharko dituzte. Whatsapp edo e-posta mezuetan, berriz, argazkia non egina den azaldu eta hainbat datu pertsonal eman beharko dituzte herritarrek, hala nola izen-abizenak, helbidea, herria, adina, NA, e-posta helbidea eta telefono zenbakia.
Aiarrek eta oriotarrek bidali ahal izango dituzte argazkiak lehiaketara, eta koloretako nahiz zuri-beltzeko irudiak aurkeztu ahal izango dituzte. Argazkiek, baina, inon argitaratu gabekoak izan beharko dute.
Argazkia guztiak Urolako Komunikazio Taldearen artxiboan gordeko dira, eta hedabide taldeak bere egiteko du jasotako lanak publikatzeko eskubidea. Hala, bidalitako lanen jabe den lehiaketako parte-hartzaileak lanak erabiltzen eta jendaurrean erreproduzitzen uzten dio Urolako Komunikazio Taldeari, egilearen izena adierazita.
Lege oharra
Datu Pertsonalak Babesteko Araudia betez, jakinarazi nahi dizugu zure datu pertsonalak Urolako Komunikazio Taldea, Koop. E. enpresaren tratamendu-sistemetan jasoko direla, lehiaketa hau kudeatzeko eta eskualdeko hedabide desberdinen eskaintzen berri emateko. Era berean, lehiaketan parte hartzen duten argazkiak webgune eta kanal desberdinetan hedatuak izango dira. Sariduna gertatuz gero, zure identifikazio-datuak argitaratuak izango dira, baita saria modu egokian kudeatzeko beharrezkoak izan daitezken kolaboratzaile zuzenei komunikatuak ere. Zure datuak babesteko eskubideak noiznahi erabil ditzakezu. Horretarako, idatzi bat bidali beharko duzu Soreasu z/g - 20730 Azpeitia helbidera edo admnistrazioa@ukt.eus helbide elektronikora. Zure datu pertsonalen babesari buruzko informazio zehatzagoa urolakosta.hitza.eus/hitzakide/pribatutasun-politika/ web orrian aurki dezakezu.