Igandean Eusko Legebiltzarrerako ordezkariak aukeratzeko hitzordua izango dute Aiako eta Orioko bizilagunek. Hautesle-erroldaren arabera, Aian 1.505 herritarrek izango dute botoa emateko eskubidea, eta Orion 4.460 lagunek. Guztira, 1.718.323 herritar daude deituta igandean botoa ematera Euskal Autonomia Erkidegoan.
Hala, Gipuzkoan hamalau hautagai zerrenda aurkeztu dituzte igandeko Eusko Legebiltzarrerako hauteskundeetarako: EAJ, EH Bildu, PP-Ciudadanos, PSE-EE, Elkarrekin Podemos-IU, Pacma, Recortes Cero-Grupo Verde, Bidezko Mundurantz, Euskadiren Aldeko Libreak, Equo Berdeak, Aulki Zuriak, Vox, UCDE eta Alderdi Libertarioa.
2016ko irailaren 25ean egin ziren azken Eusko Legebiltzarrerako bozak. Orduan, Aian eta Orion boto gehien EAJk lortu zituen: 1.197 babes izan zituen Orion eta 479 Aian. Bigarren indarra, berriz, EH Bildu izan zen bi herrietan (917 boto Orion eta 362 Aian), eta Elkarrekin Podemos izan zen hirugarren bozkatuena. Alderdi morearen ondoren, PSE-EE izan zen laugarren indarra.