Maiatzaren 26an izango dira udal eta foru hauteskundeak, eta argitaratu dira, dagoeneko, hautagaien zerrendak. Gipuzkoako Batzar Nagusietarako aurkeztu dituzten zerrendetan badira hainbat oriotar eta aiar, tartean, Ana Priede, Ione Cisneros, Jon Ander Azpiroz eta Miren Elixabete Huegun.
Hautatuak izateko aukera dutenen artean, Ana Priede aipatu behar da, hala balitz, estraineko aldia izango luke batzarkide. Hirugarren lekuan dago Deba Urola barrutian PSE-EEk osatu duen zerrendan.
Elkarrekin Podemos taldeak aurkeztu duen zerrendari dagokionez, Ione Cisneros laugarrena da Deba Urola barrutian. Ikusi beharko da, legealdi honetan bezala, hautatua izan eta batzarkide lanak egin ahal izango dituen.
Bestalde, EAJ-PNV alderdiak aurkeztu duen zerrendaren parte dira Jon Ander Azpiroz eta Miren Elixabete Huegun. Bederatzigarrena da Azpiroz, eta lehenengo ordezko Huegun Deba Urola barrutian.