Orioko Pilota Elkarteak antolatutako pilota txapelketetako hainbat partida jokatuko dira asteburu honetan.
Gaur, ostirala, Aiako eta Orioko benjamin eta kimuen bikotekako finalerdiak eta finalak jokatuko dira. 17:00etan hasiko dira norgehiagokak. Orioko Pilota Elkarteak txapelketa hori pilota eskolako gazteentzat antolatu du, aurten lehen aldiz.
Baina ez dira txapelketa horretako partidak bakarrik izango gaur. Izan ere, San Pedrotako Gomazko Pilota Txapelketa hasiko da, sanpedroak bitartean jokatuko da lehiaketa. Kasu honetan, sei bikotek eman dute txapelketarako izena: llarramendi-Berasaluze; Esoain-Laskibar; Murua-Arruti; Maiz-Balerdi; Arruti-Polo; eta, Lizaso-Contreras.
150 neska-mutil pilotan
Bihar, larunbata, berriz, San Pedrotako Haurren Pilota Txapelketari ekingo diote. 150 neska-mutilek eman dute txapelketarako izena. 15:00etan hasiko dira lehen partidak.