Festaz beteriko bi asteburu eder izan ondoren, San Martin Egunaren biribiltzen ari dira gaurkoan Urdanetako bizilagunak auzoko jaiak. Amaierako eguna bada ere, oraindik ere ospatzen jarraitzeko gogoz daudela erakutsi dute goizetik.
Mezaren ondoren, frontoian elkartu dira patata tortilla lehiaketa zuzen-zuzenean eta bertatik bertara jarraitzeko. Aurten, bederatzi tortilla aurkeztu dituzte sariketara, eta jai batzordekoek eguerdia girotzera joan diren Izer aita-seme trikitilariak izendatu dituzte epaimahaiko kide gisa.
Tortilla guztiak dastatu ondoren, irabazleak aukeratu dute eta bertaratu guztiak pozarren jaitsi dira kantxara, aurkeztutako jakiekin hamaiketakoa egitera. Bapo jateko eta edateko tenorea izan dute, baita izertarrekin dantza egiteko ere. Ondoren, herri kirol jokoak egin dituzte auzotarren artean.
Arratsaldean, trikitilariak Indamendi elkartean izango dira bertaratzen den ororen gustagarri. Ondoren, kalejira egingo dute auzoan zehar, eta festei amaiera emateko traka zaratatsua botako dute.