Arraza Anitzeko Ganaduen XXII. Enkantea egingo dute bihar, larunbatarekin. Igandetan egin ohi da normalean, baina antolatzaileek egun bat aurreratzea adostu dute hauteskunde orokorrak direla eta. Hala, Aiako Ibarrola Goikoa baserrian dagoen Testaje Zentroan izango da zita.
Bertan haragitarako idisko ugaltzaileen bi arraza aurkeztuko dituzte: Limusina eta Pirenaika. Limusin arrazako RJ eta RP ugaltzaileak ere bai.
Aiako Testaje Zentroan egingo dute enkantearen aurkezpena, 11:45ean izango da, eta hamabost minutu beranduago, hasiko da enkantea. Antolatzaileek azaldu dutenez, animalia bat erosten duenari 50 euro kobratuko dizkiete administrazio eta kudeaketa gastuengatik –agiria, gutun genealogikoa, etab. emateagatik–.