Aiako Kirol Elkarteak antolatuta, Aiako IX. Mendi Lasterketa jokatuko da igandean, Aiako Pagoeta Natur Parkean. Parte hartzaileek 14,6 kilometroko ibilbidea osatu beharko dute Aiako mendietan eta basoetan barrena, eta ibilbidea "zoragarria" dela nabarmendu dute antolatzaileek. Hala, kirola eta natura maite dituzten herritarrak lasterketan parte hartzera animatu dituzte.
Aiako Mendi Lasterketan 400 lagunentzat tokia izango da eta, hasiera batean, ostiralera bitartean irekita izango da izena emateko epea. Lasterketan parte hartu nahi duten herritarrek Kirolprobak webgunean dute izena emateko aukera, 18 euroren truke. Bestalde, hilaren 28rako parte-hartze zerrenda betetzen ez bada, egunean bertan, lasterketaren aurretik, izena emateko aukera ere zabalduko du Aiako Kirol Elkarteak. Dena dela, azken egunera arte itxaroten duten kirolariek 25 euro ordaindu beharko dute mendi lasterketan parte hartzeagatik.