Gaurko gizartea oso lehiakorra da. Txapeldun izateak eta horren bilaketa konstanteak berebiziko garrantzia hartu du pertsonen bizian. Txapeldunaren figuraz hausnartuko du Eneko Balerdik bere azken lanean.
Abenduaren 8an, astelehenean, aurkeztuko du Organik dantza konpainiak Txapeldun lana. Kepa Junkerak musika jarri eta Eneko Balerdik dantzatuko du.
Kirol munduan aritu zen zuzendaria, Natalia Monge, dantzan sartu aurretik. Txapeldun izatea ere kirolarekin lotzen da, nahiz eta beti ez den horrela. Balerdiri kontzeptua aurkeztu zion Mongek, eta bien artean obra sortzen hasi ziren. Abiapuntua proposatuta, mugimendu eta testuen sorkuntzan murgildu ziren biak. Kirolei erreferentzia eginez –aizkora, arrauna, sega, futbola, xakea, atletismoa, igeriketa, gimnasia artistikoa, boleibola...– ordubetez kirol batetik besterako bidaian arituko da dantzaria.
Zuzeneko musika ere badu ikuskizunak. Kepa Junkerak sortu du musika, eta berarekin batera Sorginak taldeko bi musikari arituko dira zuzenean. Junkerak ere sormen prozesuan parte hartu du, modu paraleloan. Musikaren erritmora dantza egingo du Balerdik, eta erritmo horretatik aldendu.
Abuztuan hasi ziren ikuskizuna prestatzen, egunean 5 orduz entseatzen. Orain, bost hilabete geroago, aurkezpena egingo dute Durangon, San Agustin Kulturgunean, 19:00etatik aurrera.