San Joan bezpera da astelehena, ekainaren 23a, eta udari ongietorria emateko eta urteko gaurik motzena ospatzeko, gaua iristearekin batera kalera aterako dira herritarrak suaren bueltan dantza egitera. Aian eta Orion, esaterako, dena prest dute une magiko horretaz gozatzeko.
Aian, 21:30ean jarri dute hitzordua, plazan. Sua 22:00etan piztuko dute, eta dantzan ariko dira herritarrak. Ondoren, txokolatea banatuko dute. Dantzarako entsegua ere antolatu dute. Bihar, ostirala, 19:30ean izango da hitzordua, frontoian, eta udalak herritarrak animatu ditu bertan parte hartzera.
Orion, berriz, urteroko egitaraua prestatu du Harribil dantza taldeak astelehen gauerako. Haurrekin egingo dute kalejira 21:00etan Kosta Tailerretik abiatuta, eta geldiuneak egingo dituzte Sarasua jatetxearen eta Arkaitz tabernaren aurrean, Herriko Plazan eta plazoletan. Geldiune bakoitzean haurrekin entseatutako dantzak dantzatuko dituzte, eta behin ibilbidea amaituta, plazoletan, suaren bueltan Harribilen emanaldia hasiko da. Han ere parte hartuko dute musika eskolako ikasle batzuek.