Badoa aurrera abuztua ere, eta horrekin batera, baita Guka Telebistaren Gure Mazedonia udako saioa ere. Mireia Galarza Bastida kazetaria herriz herri dabil Urola Kostan garaiko gaiak lantzen; ondo lagunduta ibili ere. Izan ere, Julene Sorarrain eta Ian Ruiz Lizaso ditu hark bidelagun.
Ostegunero bezala, gaur ere saio berri bat eskainiko du Guka Telebistak 21:45ean hasita: Azpeitikoa. Gaurko saioan, Galarza aurkezlea Juanjo Olaizola Burdinbidearen Euskal Museoko zuzendariarekin elkartuko da, eta Sorarrain eta Ruiz bisitariekin arituko dira solasean, beti bezala barru barruan duten jakin-mina asetuz.
Datorren asteko saioarekin, hilaren 30ekoarekin, itxiko du Gure Mazedonia Gukak. Orduan, Zumaian izango dira Galarza eta bere bi bidelagunak. Gaurko saioa Guka Telebistan jarraitu ezin duenak bihar oso osorik ikusi ahal izango du Gukaren webgune guztietan, baita orain arte emandako saio guztiak ere.