Atzo arratsaldean jokatu zuten Gipuzkoako Batel Ligako azken jardunaldia Pasaian (Gipuzkoa), eta Orio Arraunketa Elkarteak hainbat ontzi aurkeztu zituen probara. Hitzordu garrantzitsua zen, alde batetik, mailaz maila, ligako banderak banatu behar zituztelako, eta bestetik, gaurko Gipuzkoako Batel Txapelketara sailkatzeko proba baliogarria zelako.
Oriotarrek gizonezko senior, infantil eta kadeteetan lortu zuten gaurko txartela, kategoria bakoitzean lehenengo lau postuetan geratu ziren ontziek lortu baitzuten aukera. Zehazki, seniorrak hirugarren izan dira ligan, eta infantilak eta kadeteak, ligako garaile.
Gaurko hitzordua 10:30ean hasi da, hura ere Pasaian, eta Oriok lan dotorea egin du: garaipen bana lortu dute infantil eta kadete mutilek, eta bigarren izan dira senior gizonezkoak. Garaipenak segungo batengatik ihes egin die horiei. Kaiarribak irabazi du estropada 08:45;51 denborarekin, eta Oriok 08:47;14 denbora egin du. Getaria izan da hirugarren, hemeretzi segundora.