Langileak dagoeneko hasi dira Eusko Gudari kaleko frontoi zaharraren teilatua desmuntatzen. Kale horretako 36-42 zenbakidun etxebizitzak eta frontoia dauden tokian 24 etxebizitza berri, garajeak, lokal komertzialak eta erabilera publikoko espazio berri bat eraikiko dituzte, baita frontoi txiki bat ere.
Frontoi berriaren kokaleku posibleak, aldiz, bihar arratsaldean aurkeztuko dituzte herritarren aurrean. Kultur Etxean izango da aurkezpena, 19:00etan hasita, eta bertan izango dira XS arkitektura bulegoko ordezkariak, azterketaren nondik norakoak eta emaitzak azaltzeko. Halaber, kokaleku bakoitzak eskaintzen dituen aukeren berri ere emango diete herritarrei.
Frontoi berriaren kokalekua erabaki aurretik, udalak aukera posibleak aztertzeko enkargua egin zion XS arkitektura bulegoari, eta honek bi eremu posible aurreikusi ditu: alde batetik, Palota eremua, KTAren iparraldean; eta bestetik, Abaromendi eremua, Zaragueta Herri Eskolaren sarrera berriaren ekialdean, zehazki.
