Krispeta Ostegunetako hirugarren emanaldia prestatu dute ostegun honetarako Etxeluze gaztetxeko kideek. Ander Iriarteren Karpeta urdinak dokumentala proiektatuko dute, eta azaldu dutenez, "berriz ere Euskal Herriko gai sakon eta gogor bati heltzeko asmoz" aukeratu dute lana. "Dokumentala Euskal herritarron kontra erabili den torturari buruz eta beraren ondorio fisiko eta psikologikoez mintzo da", gaineratu dute. "Gure herrian inpunitate osoz torturatu da eta gaur egun 5.180 kasu baino gehiago daude erregistratuta. Horregatik, ahanzturan erori ez dadin proiektatuko dugu film hau".
Iluntzean, 19:30ean da hitzordua, eta sarrera doakoa izateaz gain, krispetak ere banatuko dizkiete bertaratzen direnei.