Orioko Mugimendu Feministak ere bat egin du Zarauzko hilketa matxistaren salaketarekin, eta elkarretaratzea egingo dute gaur, larunbatez, Herriko Plazan, 17:00etan hasita, Aski da! lelopean. Mugimendu Feministak herritar guztiak animatu ditu hitzorduan parte hartzera.
53 urteko emakume bat hiltzea leporatuta, 47 urteko gizonezko bat atxilotu zuen asteazkenean Ertzaintzak Zarautzen. Hilketa matxista gaitzesteko, Zarauzko Udalak eta herriko eragileek elkarretaratzea eta manifestazioa egin zituzten atzo iluntzean, Zarautzen. Eskualdeko herrietan ere egin zituzten protestak, tartean Aian.