Berdintasun planek emakumeen eta gizonen berdintasunaren arloan jarduteko estrategiak eta ekintzak jasotzen dituzte, eta Orioko Udalak martxan dauka Emakume eta Gizonen Berdintasunerako II. Plana. 2022ko ekainean aurkeztu zuen, eta aurtengo urtean amaituko da.
Horregatik, udala III. Berdintasun Plana lantzeko diagnostikoa egiten ari da, eta horretarako herritarren eta herriko eragileen iritziak bildu nahi ditu, bakoitzarentzat galdetegi mota bat sortuta. Hala, online betetzeko galdetegiak jarri ditu martxan, eta datorren astelehenerarte arte egongo da erantzuteko aukera.
Udalak azaldu du bi gadetegiak direla anonimoak, eta herritar guztiak animatu ditu galderak erantzutera: "Jasotako erantzunen bidez, berdintasunaren alorrean Orioren egoera zein den zehaztu ahal izango du udalak, eta herritarrek dituzten beharrak identifikatu".
Udala Kalakan kooperatibaren laguntzarekin ari da diagnostikoa osatzen, eta jakinarazi du aurrerago lan-saio ireki bat ere egingo dutela herrian. Ondoren, berriz, ekintza plan bat garatuko da behar horiei erantzuteko "eta berdintasunaren alorrean aurreratzen jarraitzeko".