Saregile emakumeen etxeko neguko egutegiaren barruan, xilografia ikastaroa eskainiko dute datorren asteartean hasita. Saioak Oihana Ugarte tolosarrak zuzenduko ditu, eta ikastaroa hasi baina lehen teknika honen inguruko informazioa eskaini du: "Antzinako teknika honen bidez, hitzak edo irudiak eskuz zizelkatuko ditugu linoleo gainean, gubia baten bitartez irudiari dagokion eremua erliebean utziaz, arrabola matrize gainean pasa eta erliebea tindatuaz, paperean estanpatu ditugu torkuloaren laguntzarekin gure amets, argi-ilun, aldarrikapen eta barne bidaiak".
Bestalde, xilografia tailer honetan, grabatua egiteko antzinako teknika ikasteaz gain, emakumeek beren eskuekin sortzeko daukaten gaitasunari aukera emango diotela azaldu dute Saregileko kideek. Horrez gain, historian zehar emakume artistek izan duten paperaz ere arituko dira ikastaroan: "Izan ere, artearen historiak emakumeak itzalpean utzi ditu eta ez dugu emakume sortzaileen erreferentzia garbirik, ikusezinak izan dira beti", azaldu dute Saregileko kideek.
Izena emateko galdetegi hau bete daiteke. Ikastaroa urtarrilaren 21ean hasi eta otsailaren 25ean amaituko da, eta 25 euro balio du. Saioak asteartero izango dira, 18:00etatik 20:00etara bitartean, Saregilen bertan.
