Ikuskizun galanta jarraitzeko aukera izan zen atzo goizez Donostiako uretan. Euskadiko traineru txapelketa jokatu zuten goiz partean itsaso zakarrarekin, eta parte hartu zuten traineruek nahikoa lan izan zuten, olatuen gainean dantzan, ziabogarako eta helmugarako bidea aurkitzen. Atzoko baldintzekin, trebezia berezia erakutsi behar izan zuten patroiek.
Emakumeetan, zilarrezko domina lortu zuen Orioko Arraunketa Elkarteko traineruak. Bigarren izan ziren oriotarrak bandera irabazi zuen Arraun Lagunaken atzetik.
Beteranoen estropada ere jokatu zuten atzo goizean Donostian, eta astebete lehenago Gipuzkoako traineru txapelketan gertatu bezala Orioko Badok 13 traineruak astindu zuen irabazlearen bandera. Larunbatean ere, etxera ekarri zuten bandera beteranoek. Hain zuzen, Pontejosen jokatu zuten estropada irabazi ondoren.
