Ibaizabalen jokatu da gaur arratsaldean Eusko Label ligako zazpigarren jardunaldia, Sestaoko Udalaren XXI. bandera, hain zuzen. Ibai horretako kaleekin eta korronteekin asmatzea ez da lan samurra izaten, eta horretan asmatzen saiatu dira ontziak.
Orio Orialki ohorezko txandan aritu da Hondarribia, Donostiarra eta Bermeorekin batera. Bermeok hartu du aurrea lehen txandan, eta postu horretan heldu da lehen ziabogara; segundo gutxira eman dute buelta Donostiarrak eta Hondarribiak; Oriok, berriz, bi traineru galdu ditu ziaboga unerako. Bigarren luzetik aurrera Bermeo eta Hondarribiaren arteko borroka izan da; Donostiarra eta Orio atzean geratu dira, eta hor galdu dituzte bandera eskuratzeko aukerak. Amaieran, Hondarribia izan da garailea, bigarren izan den Bermeorekin 70 ehunekoen aldea besterik ez da izan. Donostiarra izan da hirugarren eta Orio laugarren.
Hemen ikus daitezke gaurko estropadako denborak.
Santurtzin jokatuko da bihar Eusko Label ligako zortzigarren jardunaldia. 12:13tik aurrera arituko dira ontziak Santurtziko XLIII. Ikurriña irabazteko lehian.
Orio B hamaikagarren
Pasaian jokatu da arratsaldean KAE 1 ligako estropada. Erlojupeko estropada izan da, eta ontziak bi txandatan banatu dituzte, sailkapen orokorreko postuen arabera. Orio Orialki lehen txandan aritu da, eta estropadako hamaikagarren postua lortu du gaur.
Datorren astean Camargon izango du estropada Orioko B ontziak.
