Atzokoa egun berezia izan zen realzaleentzat. Izan ere, Europan jokatzeko txartela eskuratu zuen Realak Atletico Madrilekin jokatutako norgehiagokaren ostean. Europarako ametsa, ordea, ez zen ia-ia amaierara arte iritsi; izan ere, hiru minuturen faltan sartu zuen Adnan Januzaj jokalariak erabakigarria izango zen gola.
Honenbestez, bana amaitu zuten txuriurdinek partida, nahikoa, Imanol Alguacilen taldea Europa Ligara sailkatzeko. Hori lortu zuten azken denboraldia 2017-2018koa izan zen eta, orduan ere, azken jardunaldian lortu zuten sailkapena Juanmi Jimenez jokalariak sartutako golari esker.
Partida amaitu berritan, entrenatzaile oriotarrak eskerrak eman nahi izan zizkien "amets hori betetzea" posible egin duten guztiei, baita taldeari ere orain dela hiru urte "bere aldeko apustua" egiteagatik.