Indianoak Ibaialde Elkarteak beterano mailako estropada antolatu du larunbaterako, Orioko Udalaren laguntzarekin. 16:00etan hasiko da norgehiagoka, eta sprint distantziakoa izango da. 500 metroko arraunketa eremua zehaztu dute, eta txanda bakoitzean hiru ontzik parte hartuko dute; ibilbidea hiru aldiz osatu beharko dute traineruek, kale bakoitza behin zeharkatuz.
Estropadaren ondoren cava eta txistorra pintxoak eskainiko ditu Indianoak Ibalialde elkarteak Orioko plazan.
Indianoak Ibaialde espedizioa
Indianoak Ibaialde traineruak Ternuan barrena espedizioa egingo du uztaila bukaeran eta abuztua hasieran. Iparraldeko, Bizkaiko eta Gipuzkoako arraunlariek osatuko dute eskifaia, tartean Zarauzko Arraun Elkarteko arraunlari Juan Angel Garmendia oriotarrak.
Kirol erronka izateaz gain, euskal itsas gizonek mendeetan egindako lanari omenaldia ere izango da. 400 kilometro egingo dituzte hamar egunetan zehar, eta horretarako 21 arraunlarik txandaka egingo dute arraunean. Espedizioaren zatirik handiena kostaldetik gertu egingo dute, baina etapa batzuetan itsaso zabalean arraunean ere egin beharko dute.