Gipuzkoako Bertsopaper Lehiaketa egingo da ostiral honetan, martxoaren 17an, Orioko Herri Ikastolan. Gipuzkoako Bertsozale Elkarteak eta Ikastolen Elkarteak elkarlanean antolatzen dute urtero Gipuzkoako Eskolarteko Txapelketa eta horren barruan sartzen da Bertsopaper Lehiaketa. Otsailean hasi ziren saioak eta bosgarrena da Oriokoa.
Gipuzkoako ikastola guztietatik etorritako 300 ikasle baino gehiagok parte hartuko dute ostiraleko lehiaketan. 15:00etan hasiko dira bertsopaperak idazten. Hauek dira parte hartzaileei proposatuko zaizkien ariketak:
- L.H. 3-4: gaia emanda bertso bat edo bi kopla.
- L.H. 5-6: gaia emanda bi bertso edo lau kopla.
- D.B.H. 1-2: gaia emanda bi bertso edo sei kopla.
- D.B.H.3-4 eta batxilergoa: gaia emanda hiru bertso edo sei kopla.
Bertso paperak idatzi ondoren, 16:30 aldera, saio didaktikoa izango dute parte-hartzaileek. Saio horretan, inguruko bertso-eskoletako haurrek eta bi bertsolari ezagunek saio bat eskainiko die idatzizko lanak egin dituzten ikasleei.