Orioko musulmanen hirugarren belaunaldikoek Islama eta hizkuntza arabiarra ikas zezaten ikastaroak antolatu zituzten Orioko meskitan. Horrela ezagutu zuten elkar guraso askok eta, hortik abiatuta, sortu dute Orioko emakume musulmanen taldea.
Astero biltzen dira meskitan erlijioaz, ohiturez, hezkuntzaz, integrazioaz... hitz egiteko. Hainbat jatorritako emakumeak daude bertan: badira hemen jaiotakoak, txikitan etorritakoak eta baita heldutan etorritakoak ere. Islamaren inguruan ezjakintasuna dagoela uste dute eta, horregatik, erlijioaren inguruko pertzepzioa okerrekoa dela zoritxarrez. Bi kulturen arteko zubiak eraikitzea garrantzitsua da emakume musulmanentzat; musulmanek herritar bezala parte hartzea eta tolerantzia egotea.
Lehen elkarretaratzea egin dute dagoeneko
Parisko atentatuen harira antolatu zuten lehen elkarretaratzea Orioko Emakume Musulmanen taldeak. Azaroaren 29an plazan elkartu ziren Frantziako hiriburuan gertatutakoa arbuiatzeko eta Islamak terrorismoarekin loturarik ez duela azpimarratzeko.