Herritarrek hainbeste desiratutako proiektuak ateak irekiko ditu azkenean; datorren astelehenean, urriaren 26an, Orioko Ludoteka martxan jarriko du Txurrumuskik. Aste osoan zehar, 17:00etatik 19:30era ate irekiak egingo dituzte eta izen-emateak jasoko dituzte. Ludoteka ezagutu, informazioa jaso eta zalantzak argitzeko aukera izango dute erabiltzaile izan nahi dutenek.
Horrez gain, haurrek ludotekan jolasteko aukera izango dute astelehenetik aurrera: jolasak eta txokoak ezagutu ahal izango dituzte ate irekietan. HH5. mailatik LH4. mailarako haurrek, jolas libreez gain, hezitzaileek dinamizatutako jolasez gozatu ahal izango dute ludotekan.
