San Pedro jaietan ohitura bihurtu den bezala, ekainaren 27an 7. Triatloi Herrikoia izango da Orion, Ikastolak antolatuta. Ohiko moduan, hiru mailatan banatuko dira parte-hartzaileak: gaztetxoak –LH4tik LH6ra–, gazteak –DBHkoak– eta helduak –1998 edo lehenago jaiotakoak–.
Gaztetxoak 13:10ean hasiko dira eta 100 metro igerian, 2 kilometro bizikletan eta 800 metro lasterka egin beharko dituzte. 13:30ean gazteen txanda izango da; 200 metro igerian, 3 kilometro bizikletan eta 1.000 metro korrika egingo dituzte horiek. Azkenik, helduak 14:00etan aterako dira eta 300 metro igerian, 6 kilometro bizikletan eta 1.800 metro korrika egingo dituzte.
Izen-ematea Ikastolan eta Karela kiroldegian egin daiteke ekainaren 25era arte. Kaskoa eramatea derrigorrezkoa dela diote antolatzaileek.