17 egun barru, ekainaren 29an, hasiko da San Miguel Liga Bartzelonan. Kantauri itsasotik Mediterraneo itsasora joango dira oriotarrak, paladaz palada ligako lehen bandera eskuratzeko ahaleginak egitera. Iaz bezala, aurten ere Bartzelonara itzuliko da liga eta II. Euskadi Basque Country bandera egongo da jokoan, 12:00etatik aurrera.
Guztira 19 bandera jokatuko dira ligan zehar: Bartzelonan II. Euskadi Basque Country, Galizian II. Bandeira Nauta Sanxenxo, Pedreñan IX. Marina de Cudeyo, Donostian II Eusko Label, Pasai San Pedroko bandera, Orioko bandera, Getxoko Ikurrina eta Zierbenako Petronor bandera. Etenaldi bat eta gero, Galiziako Moañan eta Boiroko banderak, Zarauzko Estropadak, Laredoko bandera, Hondarribiako bandera, XXIII Noble Villa de Portugalete, Bilboko bandera, Bermeoko bandera eta Portugaleteko El Corte Inglés XL.
Euskotren bandera lortzeko lehen urratsa, sailkatzea
Berdintasuna da nagusi emakumeen taldeen artean. Lehia, hortaz, ziurtatuta dago Euskotren Ligan. Hilabete barru emango zaio hasiera ligari, uztailaren 12an, Pedreñan. Arraunez blaituko diren asteburua izango da, hurrengo egunean Eusko Label bandera astintzeko helburuarekin lehiatuko baitira Donostian. Arraunez eta urduritasunez beteriko aste bukaera, izan ere, estropada horietan erabakiko da zeinek bogatuko duen zumaiarrekin ondoren sei estropadetan.
Zazpi ontzi daude daude lehian, baina tokia soilik hirurentzako dago. Hibaika, Jamones Ancin, Santoña Grupo Tanet, Cabo, Getarita Zarautz eta etxeko taldea, Orio Babyauto. Oriotarren helburua Zumaiarekin lehiatu ahal izateko txartela da; hori da duten lehen xedea.
Pedreñan hasiko da Euskotren Liga, baina hainbat herritan egingo du geldialdia:San Pedron, Orion, Getxon, Zierbenan eta Zarautzen. Azken honetan bitan jokatuko da estropada, eta bigarrengoan garailea zein den erabakiko da.