Beste eskola batzuekin batera, maiatzean erakutsiko dute Guggenheim museoan gelan egiten ari diren lana. Maiderri, gelatik atera eta, hitz batzuk lapurtu dizkiogu:
-Zer moduz eskolan, Maider?
Oso ondo. Eskola bakoitzak bere ezaugarriak ditu. Zaraguetan, alde batetik, herri giro ederra dago eta hori nabaritzen da, eta bestetik, programarekiko eskolaren interesa ere nabarmentzekoa da. Desberdina da artea erakustera joatea matematika edo beste edozer irakastera etorriko banintza bezala, edo hemen bezala, zaindua sentitzea. Hemen oso onartua sentitu naiz, interesa baduzuela sentitu dut. Urte asko daramatzat programa honetan parte hartzen, eta ez dut esateagatik esaten.
-Zer ematen dizute zuri, artista gisa, horrelako proiektuek?
Alde batetik, ni nire lanean murgilduta nagonean, ondo datorkit gazteekin kontaktuan egotea eta gauza arinagoak egitea. Oso interesgarria suertatzen zait horrelako harremanak izatea, beste ikuspuntu batzuk ezagutzea. Niretzat aberatsa da oso.
-Eta ikasleei. Zer uste duzu ematen diela ikasleei horrelako interbentzio batek?
Nire ustez ematen die beste ikuspuntu batzuetatik begiratzeko aukera. Artea Ikasbide programak egiten duena da curriculumean garatzen diren edukiak landu baina arteren bidez. Adibidez, gure lan honetan denbora eta natura lantzen ari gara, baina ikuspuntu oso desberdinetik. Horrek edukien inguruko begirada berriak eskaintzen dizkie ikasleei. Horretaz aparte, eskaintzen dizkie ere bai, artea bera garatzeko gaitasunak eta erramintak. Hori ere inportantea da, gorputzarekin, eskuekin… lan egiten ere ikasteko.
-Ez dugu gauza handirik aurreratu nahi, baina zer esan zenezake egiten ari zareten lan horretaz? Zer ikusiko dute Guggenheim-en?
Ba urtean zehar landu duguna Guggenheim museoari emango diogu eta haiek erakusketa montatuko dute. Lanaren gaia hauxe da: “Denboraren eragina naturan”. Denboraren joanak zenbait elementutan, esate baterako, zeruan edo zuhaitzetan, nola eragiten duen adieraziko dugu, forma eta kolore desberdinekin.
-Gaur egun, jende askori kosta egiten zaio arte garaikideaz gozatzea, arte garaikidea baloratzea. Zer uste duzu egin behar dugula?
Eskola batean egonda, nire ustez hezkuntzaren bitartez egin dezakezuen onena ikasleak artearekin sentsibilizatzea da. Eskoletan, eta oro har hezkuntzan, arteari garrantzia ematea oso garrantzitsua da. Matematika ulertzea ere oso zaila da, urte askotako lana da. Ba artearekin berdin.
-Urrian, Donostian, Tabakaleran eta Kutxa Kubo aretoan, erakusteta bat zabalduko duzue zure lanaren atzera begirako bat eskainiko duena. Zer esango zenieke hara joan nahi duten ikasle, guraso eta gainontzekoei?
Ba bertan egingo dut azkeneko hamar urteko lanaren errebisio bat, eta baita ere, horrekin lotuta, hasieratik egin ditudan lanak. Oso polita izango da. Niretzat oso berezia, nire hirian egingo delako, eta lan asko bata besterarekin harremanetan daudelako: “Ataskoa” proiektutik gaur egun egin ditudan lanetara, forma, jende eta espazio desberdinetan egindakoak.
Urrian inauguratuko da, eta otsailaren 1-era arte egongo da ikusgai, hiru hilabete guztira. Gonbidatuta zaudete.