Datorren ostegunean, otsailak 16, Gutik Zura dokumentala proiektatuko da kultur etxeko areto nagusian, 19:30ean hasita.
Gutik Zura proiektua M. Jose Barriola Baraibarrek sortu, sustatu eta zuzendu du eta horren emaitza da ordu eta erdiko dokumental hau. Dokumentala Jon Maia bertsolariak zuzendu du eta gidoia bera eta Mari Jose Barriolaren artean idatzi dute. Argazki-zuzendaria Juantxo Sardon Altuna urnietar ezaguna da.
Dokumentala eman eta gero, solasaldia izango da Jon Maiarekin eta bertaratzen direnek aukera izango dute parte hartzeko eta galderak egiteko.
Euskal Herria eta zura: iragana, oraina eta etorkizuna
Dokumentalaren helburu nagusia basoaren, zuraren eta euskal gizartearen arteko harremanak gizarteratzea da: zer izan den, zer den eta, aurrera begira, zer izan daitekeen.
Basoa eta zura oso garrantzizkoak izan dira Euskal Herrian eta, neurri batean, euskaldunon izaera definitu dute. Kontu hori ez da oso ezaguna eta, dokumental honen bidez, egileek ideia hori zabaldu eta gizarteratu egin nahi dute. Dokumental honetan antzinatetik etorkizunerako bidaia egiten da, Euskal Herriko gizakiaren eta zuraren arteko harremana azalduz. Horretarako, pertsona jakin batzuen bizi-esperientzia eta adituen iritziak uztartzen dira, eta istorioen bidez kontatzen da historia.
Jon Maia bertan izango da
Jon Maia bertsolaria, euskal abeslaria, euskal idazlea, zine zuzendaria, itzultzailea eta kultura eragilea da. Euskal Filologian lizentziaduna da.
Eskarmentu handikoa da ikus-entzunezko alorrean, Mihiluze, Martina eta Udazkeneko lore saioetako gidoilari izan zen. Horretaz gain, bi dokumental zuzendu ditu: Bidai Intimoak –Orio produkzioak, Korrika–; Apaizac Obeto –Orio produkzioak– eta Gazta Zati Bat –Nazioen Mundua–.
Euskal Talde ugarirentzat letragile izan da Jon Maia, besteak beste: Negu Gorriak, Gozategi, Bizkar Hezurra, SA, Anari, Def con Dos, Mikel Urdangarin, Benito Lertxundi, Gari, Esne Beltza, Ken zazpi… Karidadeko Benta –Gaztelupeko Hotsak– taldearen sortzaile, abeslari eta letragile izan da; hiru disko kaleratu zituzten.
Hainbat literatur lan ere kaleratu ditu: Irudika Idurika –Gatuzain–, margolanak eta bertsoak elkartzen dituen liburua, Mikel Dalbret margolariarekin batera. Zikloak –Arabera–, argazkiak eta bertsoak elkartzen dituen liburua, Joseba Olalde argazkilariarekin batera. Riomundo –Txalaparta– nobela eta Apaizac Obeto –Elkar–, abentura, historia eta kronika liburua.