'Etnika' izeneko erakusketa izango da kultur etxean azaroan

Argizaiol mota ugari ikusgai

Javier Cenzano argizaiolekin interesatu zen orain dela urte batzuk eta lan handia egin du geroztik argizaiolen pistari segitzen. Horren ondorio da erakusketa hau. Gipuzkoan barrena joan-etorri asko egin ondoren, argizaiol mota ugari ezagutzeko aukera izan du eta horien erreplikak egin ditu era tradizionalean. Lan handi horren emaitza da gaur egun daukan 100 argizaioletik gorako bilduma. Guztiak berak egindakoak dira, benetako modelotan oinarrituta eta material birziklatuak erabilita. Bilduma horren zati bat da Orion erakutsiko duena.

Argizaria biltzeko olak

Euskarazko izenak garbi adierazten du zer den argizaiola: argizaria biltzeko ola bat. Itxura antropomorfoa duen zurezko pieza bat da, 30-50 bat zentimetrokoa. Bi aldeetatik landuta egoten da, argizaria biltzeko tokian izan ezik. Argizaiola garrantzizkoa zen, garai batean, heriotzarekin lotutako erritoetan.

Erakusketa goizez eta arratsaldez izango da zabalik: 10:30etik 13:00etara eta 16:30etik 20:00etara.