Hitzarmenak, hasiera batean, urtebeteko indarraldia izango du; baina urtero luza daiteke beste urte batez, bi aldeek hala erabakitzen badute. Nolanahi ere, gehienez lau urtez luza daiteke; hau da, 2019. urtearen bukaera arte.
Hitzarmenaren bidez, Berdin-Berdinak elkarteak 9.500 euro jasoko ditu, BERDINDUZ programa martxan jarri eta kudeatzeko.
BERDINDUZ programaren bidez, honako helburuak bete nahi dituzte Berdin-Berdinak elkarteak eta Orioko Udalak:
- Desgaitasun-egoeran dauden edo gizarte-integrazioko arazoak dituzten haur eta gaztetxoei aukera erraztea aisialdiko jardueratan parte hartzeko: kirol jarduerak, kulturalak, artistikoak, musikalak...
- Programan parte hartzen duten eragileei prestakuntza ematea, desgaitasunari buruz duten perspektiba aldatzeko: positiboan pentsatzea, duintasuna, aukera-berdintasuna, eskubideak eta betebeharrak...
- Programan parte hartzen duten eragileei prestakuntza ematea, elkarbizitzako balioei buruz duten perspektiba aldatzeko: aniztasunaren errespetua, eskuzabaltasuna, enpatia, elkartasuna...
- BERDINDUZ programaren berri zabaltzea oriotarren artean eta herriko eragileen artean, hedatu nahi ditugun oinarrizko ideiak gizarteratzen laguntzeko.
- Boluntario-sare aktibo, motibatu eta iraunkorra sortzea Orion.
LaCaixak ere parte hartzen du BERDINDUZ programan, kostuaren zati bat finantzatuz.
Programaren aurkezpena
Hitzarmena uztailean sinatu bada ere, BERDINDUZ programaren aurkezpena irailean egingo dute prentsa aurrean Udalak eta kirol elkarteak, LaCaixako ordezkariarekin eta Udaleko talde politikoekin batera.