Gomazko paleta kategorian lehiatzen aritu dira Aia eta Orio Herriarteko Pilota Txapelketan. Aiak Astigarraga izan du aurkari; etxean jokatu zuten jardunaldian aiarrak nagusitu ziren 2-1 emaitzarekin, baina Astigarragan etxekoak izan ziren nagusi 2-1 emaitzarekin. Hasiera batean, bi taldeen arteko berdinketa gertatu bazen ere, puntuei erreparatuta, Astigarra gailendu zen; hortaz, Aia ez da fasez pasa Herriarteko txapelketan.
Oriok, berriz, Zarautz izan zuen aurkari txapelketako lehen fase horretan. Lehen jardunaldian Zarautz nagusitu zen; itzulerako partidak ostegunean jokatzekoak ziren Orion, baina, tamalez, jokatu gabe egin zuen aurrera Zarautzek. Orioko Pilota Elkarteko kideek azaldu dutenez, Oriok Herriartekoan pala kategorian taldea osatu duen lehen urtea izan da, baina taldekide kopuru justuarekin sortu zuten taldea, ordezkorik gabe. Beraz, taldekide bat partida jokatu ezinik geratu zenean, oriotarrek ezin izan zuten jardunaldira aurkeztu.