Ikastetxeak epemuga zehaztu gabe itxi ditu Eusko Jaurlaritzak

Arabako, Bizkaiko eta Gipuzkoako ikastetxe guztiak epemuga zehaztu gabe itxi ditu Eusko Jaurlaritzak. Hezkuntza Sailak gaur, asteartea, eman du erabaki horren berri ohar bidez. Joan zen astean, erakundeak hamalau egunerako utzi zituen bertan behera aurrez aurreko eskolak, baina itxialdia luzatzea erabaki du, "beste abisu bat eman arte". Horrenbestez, ikusteko dago noiz itzuliko diren ikastetxeak ohiko jardunera.

Hezkuntza Sailak jakinarazi duenez, gertaeren bilakaera eta agintariek hartutako neurriak ikusita hartu du itxialdiaren epea luzatzeko epea. Gainera, orain arte indarrean diren neurriekin jarraituko dutela adierazi du Cristina Uriarte Hezkuntza sailburuak: "Ikastetxeei adierazitako gidalerroek indarrean jarraitzen dutela egiaztatzen dugu, bai irakaskuntza jardueraren garapenari dagokionez, bai ikasleei eman beharreko arretari eta familiei eskaini beharrko komunikazioari dagokionez". Hark osasun agintarien gomendioak "zorrotz" betetzearen garrantziaz ohartarazi du, "jardueren normaltasunari ahalik eta lasterren berrekin ahal izateko".