Martxan da KARKARA orainkariaren webgune berria. Arduradunek azaldu dutenez, irakurleentzat erabilerrazagoa da, eta herritarren beharretara egokitu dute. Izan ere, nabarmendu dute webguneko trafikoaren gehiengoa gailu mugikorretatik datorrela gaur egun, eta ehunekoa etengabe haziz doala. Horregatik, telefono mugikorretan eta tabletetan ondo ikusten den, eta maneiagarria den webgunea sortu dute. Horretarako diseinua garbitu eta sinplifikatu dute, hiru zutabeko diseinu batetik zutabe bakarreko diseinura pasatuz. "Lehen alderik alde zabaltzen ziren menuak orain atzamarraz erraz maneiatzeko moduko ‘hanburgesa estiloko’ botoietan bildu ditugu", adierazi dute.
Horrez gain, multimedia edukiaren karga eta bisualizazioa ere azkartu egin da.
Plataformaren bertsio berria toki komunikabideek, tartean Karkarak, TOKIKOM toki komunikabideen bateraguneak eta Codesyntaxek diseinatu dute elkarlanean.