Hainbat urte antolatu gabe izan ondoren, aurten berreskuratu egingo dute Aian, Pagoeta eguna. Igande honetan izango da, eta egun osorako egitaraua antolatu du Aiako Gazte Asanbladak. Orain urte batzuk gisa, Pagoeta mendira taldean igotzea da asmoa. 10:00etan jarri dute hitzordua, eta herriko plazatik abiatuko dira txangoa egitera. Mendi buelta egin ondoren, lagun artean herri bazkaria egingo dute. 14:00etan elkartuko dira bazkaltzeko, herriko plazan.
Bazkal ondoren bingo musikatua izango da, eta Aiako Gazte Asanbladatik azaldu dutenez, iluntzean Aristerrazura joango dira, dantza egitera.
Herri bazkariko izen-ematea
Herri bazkarian izena emateko aukera bihar amaituko da. Joanenen (Iturriozena taberna) daude eskuragarri bazkarirako sarrerak. Helduen txartela, bost euro kostatuko da, eta haurrenak, bi euroan salduko dira.
Prezio horren barruan izango dira edaria, gatza eta kafea. Horrez gain, parrillak jarriko dituzte (ikatza baita) bertaratzen diren herritarrentzat.