Datozen asteetarako egitarau mardula prestatu dute Aian, eta gaur arratsaldean egingo dute iragarritako aurreneko jarduera: Gabonetako zuhaitzaren apainketa. 16:30ean jarri dute hitzordua herriko plazan, eta ume eta heldu, denak gonbidatu dituzte ekintzan parte hartzera.
Hori bukatutakoan, 18:30ean, EITB maratoirako bideoa grabatuko dute; aurtengoan, esklerosi anizkoitzaren ikerketarako ari dira dirua biltzen. Bustitzeko prest joateko aurreratu dute antolatzaileek. Zuhaitzaren apainketa bezala, grabazioa ere herriko plazan egingo dute.