Udazkeneko larunbat, igande eta jaiegunetarako familientzako plan dibertigarria prestatu dute Aiako Iturraran parketxean; hain zuzen ere, hango lorategi botanikoan altxorraren bila jolastea. Jarduerak GOT Gipuzkoako Orientazio Taldeak prestatutako orientazio zirkuitu bat izango du oinarrian, eta helburua izango da "jolasaren bidez naturan orientatzen ikastea eta inguruan duguna ezagutzea". Parte hartzaileek balizak topatu beharko dituzte, eta naturarekin lotutako hainbat galdera erantzun. Antolatzaileek azaldu dutenez, haurrek zein helduek parte hartzeko moduko jolasa izango da.
Bertaratzeko asmoa dutenek aldez aurretik eman beharko dute izena 943-83 53 89 telefono zenbakira deituta edota iturraran@gipuzkoanatura.eus helbidera idatzita. Jardueran parte hartzeko, helduek bost euro ordaindu beharko dute; eta 12 urte arteko haurrek, hiru euro. Bi ordu eta erdiko iraupena izango du jarduerak, eta jolasari hasiera 10:00etatik 11:30era bitartean eman beharko diote familiek, eguerdirako bukatu ahal izateko.